ಹೈಲೈಟ್ಸ್‌:
2021ರ ಸಾಲಿನ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಕೊನೇ ಬಾರಿ ಆಡಿದ್ದ ದಕ್ಷಿಣ ಆಫ್ರಿಕಾದ ದಿಗ್ಗಜ ಎಬಿ ಎಬಿ ಡಿವಿಲಿಯರ್ಸ್‌.
ಇಂಪ್ಯಾಕ್ಟ್‌ ಪ್ಲೇಯರ್‌ ನಿಯಮದ ಮೂಲಕ ಮತ್ತೆ ಐಪಿಎಲ್‌ ಕೆರಿಯರ್‌ ಆರಂಭಿಸುವುದರ ಬಗ್ಗೆ ಮೌನ ಮುರಿದ ಮಿಸ್ಟರ್‌ 360 ಬ್ಯಾಟರ್‌.
ಕ್ರಿಕೆಟ್‌ ವೃತ್ತಿಬದುಕು ಅಂತ್ಯಗೊಳಿಸಲು ಇದ್ದ ಬಲವಾದ ಕಾರಣವನ್ನು ಮತ್ತೊಮ್ಮೆ ಬಹಿರಂಗ ಪಡಿಸಿದ ಎಬಿಡಿ.
ಬೆಂಗಳೂರು: ಮಿಸ್ಟರ್‌ 360 ಖ್ಯಾತಿಯ ದಕ್ಷಿಣ ಆಫ್ರಿಕಾದ ದಿಗ್ಗಜ ಬ್ಯಾಟ್ಸ್‌ಮನ್‌ ಎಬಿ ಡಿವಿಲಿಯರ್ಸ್‌ ತಮ್ಮ 36ನೇ ವಯಸ್ಸಿನಲ್ಲೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ದೂರ ಸರಿದು ಅಚ್ಚರಿ ಮೂಡಿಸಿದ್ದರು. ಇನ್ನು ಫ್ರಾಂಚೈಸಿ ಲೀಗ್‌ ಟೂರ್ನಿಗಳಲ್ಲಿ ಎಬಿಡಿ ತಮ್ಮ ಆಟ ಮುಂದುವರಿಸಿ 2021ರ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿವರೆಗೆ ಕ್ರಿಕೆಟ್‌ ಪ್ರಿಯರಿಗೆ ಸ್ಪೋಟಕ ಬ್ಯಾಟಿಂಗ್‌ನ ರಸದೌತಣ ಬಡಿಸಿದ್ದರು. ಅಂದಹಾಗೆ ಬ್ಯಾಟ್‌ ಹಿಡಿದು ನಿಂತರೆ ಈಗಲೂ ವಿಶ್ವದ ಶ್ರೇಷ್ಠ ಬೌಲರ್‌ಗಳ ಎದೆಯಲ್ಲಿ ನಡುಕ ಹುಟ್ಟಿಸುವ ಸಾಮರ್ಥ್ಯ ಹೊಂದಿರುವ ಎಬಿಡಿ ಕಮ್‌ಬ್ಯಾಕ್‌ ಮಾತ್ರ ಸಾಧ್ಯವೇ ಇಲ್ಲ ಎಂದು ಮತ್ತೊಮ್ಮೆ ಹೇಳಿಕೊಂಡಿದ್ದಾರೆ.
2021ರ ಐಪಿಎಲ್‌ ಟೂರ್ನಿಯಲ್ಲಿ ಆರ್‌ಸಿಬಿ ತಂಡ ಪ್ಲೇ ಆಫ್ಸ್‌ ತಲುಪಿತ್ತು. ಆ ಟೂರ್ನಿಯಲ್ಲಿ ಆರ್‌ಸಿಬಿ ಪರ ಎಬಿಡಿ ಭರ್ಜರಿ ಬ್ಯಾಟಿಂಗ್‌ ನಡೆಸಿ ಗಮನ ಸೆಳೆದಿದ್ದರೂ, ತಂಡಕ್ಕೆ ಟ್ರೋಫಿ ಗೆದ್ದುಕೊಡಲು ಸಾಧ್ಯವಾಗಲಿಲ್ಲ. ಪರಿಣಾಮ ಐಪಿಎಲ್‌ ಕೆರಿಯರ್‌ಗೂ ವಿದಾಯ ಹೇಳಿದರು. ಆದರೆ ಐಪಿಎಲ್‌ 2023 ಟೂರ್ನಿಯಲ್ಲಿ ಬಳಕೆಗೆ ತರಲಾದ ಇಂಪ್ಯಾಕ್ಟ್‌ ಪ್ಲೇಯರ್‌ ನಿಯಮ ಹಲವು ಹಿರಿಯ ಆಟಗಾರರ ಐಪಿಎಲ್‌ ವೃತ್ತಿಬದುಕು ವಿಸ್ತರಣೆಗೆ ನೆರವಾಗಿದೆ. ಇದರ ಬಳಕೆ ಮಾಡಿ ಕೇವಲ ಬ್ಯಾಟಿಂಗ್‌ ಅಥವಾ ಬೌಲಿಂಗ್‌ಗೆ ಮಾತ್ರವೇ ಒಬ್ಬ ಆಟಗಾರನ ಸೇವೆ ಬಳಕೆ ಮಾಡಿಕೊಳ್ಳಬಹುದು. ಹೀಗಾಗಿ ಆರ್‌ಸಿಬಿ ಪರ ಎಬಿಡಿ ಕೇವಲ್ ಬ್ಯಾಟಿಂಗ್‌ ಅಷ್ಟೇ ಮಾಡಬಹುದು ಎಂದು ಹಲವರು ಅಭಿಪ್ರಾಯ ಪಟ್ಟಿದ್ದರು.
ಈ ಬಗ್ಗೆ ತಮ್ಮ ಯೂ ಟ್ಯೂಬ್‌ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಎಬಿಡಿ, ಕಮ್‌ಬ್ಯಾಕ್‌ ಮಾಡುವುದು ಸಾಧ್ಯವೇ ಇಲ್ಲ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲದೆ ತಾವು ನಿವೃತ್ತಿ ತೆಗೆದುಕೊಳ್ಳಲು ಇದ್ದ ಬಲವಾದ ಕಾರಣವನ್ನು ಮತ್ತೊಮ್ಮೆ ವಿವರವಾಗಿ ಹೇಳಿಕೊಂಡಿದ್ದಾರೆ.
"ಈ ಹಿಂದೆಯೂ ನಿವೃತ್ತಿಯಿಂದ ಹೊರಬರುವ ಆಲೋಚನೆ ನನ್ನಲ್ಲಿ ಮೂಡಿದ್ದುಂಟು. ಆದರೆ, ಅದು ಖಂಡಿತವಾಗಿಯೂ ಸಾಧ್ಯವಿಲ್ಲ. ನಾನು ನನ್ನ ಅಂತಿಮ ತೀರ್ಮಾನ ತೆಗೆದುಕೊಂಡು ಆಗಿದೆ. ಅದರಿಂದ ಹಿಂದೆ ಬರುವ ಮಾತೇ ಇಲ್ಲ. ನನ್ನ ಕ್ರಿಕೆಟ್‌ ಜೀವನದುದ್ದಕ್ಕೂ ಅಭಿಮಾನಿಗಳ ಪಾಲಿಗೆ ಮತ್ತು ನಾನು ಪ್ರತಿನಿಧಿಸಿದ ತಂಡಗಳ ಜೊತೆಗೆ ನಿಷ್ಠೆಯಿಂದ ನಡೆದುಕೊಂಡು ಬಂದಿದ್ದೇನೆ," ಎಂದು ತಮ್ಮ 360 ಯೂಟ್ಯೂಬ್‌ ವಾಹಿನಿಯಲ್ಲಿ ಡಿವಿಲಿಯರ್ಸ್‌ ಹೇಳಿಕೊಂಡಿದ್ದಾರೆ.
ಸ್ಪೋಟಕ ಬಲಗೈ ಬ್ಯಾಟ್ಸ್‌ಮನ್‌ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡದ ಪರ 2011ರಿಂದ 2011ರವರೆಗೆ ಹತ್ತು ವರ್ಷಗಳ ಕಾಲ ಬ್ಯಾಟ್‌ ಮಾಡಿ ರನ್‌ ಹೊಳೆ ಹರಿಸಿದ್ದಾರೆ. ಈ ಮೂಲಕ ತಮ್ಮದೇ ಅಭಿಮಾನಿ ಬಳಗವನ್ನು ಸಂಪಾದಿಸಿದ್ದಾರೆ. ಐಪಿಎಲ್‌ನಲ್ಲಿ ಈವರೆಗೆ ಆಡಿರುವ 144 ಇನಿಂಗ್ಸ್‌ಗಳಿಂದ 158.33ರ ಸ್ಟ್ರೈಕ್‌ರೇಟ್‌ನೊಂದಿಗೆ 4522 ರನ್‌ಗಳನ್ನು ಬಾರಿಸಿದ ಹೆಗ್ಗಳಿಕೆ ಎಬಿಡಿ ಅವರದ್ದು.
"ಬಾಲ್ಯದಿಂದಲೂ ನನ್ನ ನಿರ್ಧಾರಗಳ ಬಗ್ಗೆ ಸ್ಪಷ್ಟ ನಿಲುವು ಹೊಂದಿದ್ದೇನೆ. ಯಾವುದೇ ನಿರ್ಧಾರ ತೆಗೆದುಕೊಂಡ ಬಳಿಕ ಅದನ್ನು ಬದಲಾಯಿಸುವುದಿಲ್ಲ. ನನ್ನ ನಿರ್ಧಾರಗಳಿಗೆ ಸದಾ ಬದ್ಧನಾಗಿರುತ್ತೇನೆ. ಸಾಕಷ್ಟು ಆಲೋಚೆ ಮಾಡಿಯೇ ನಿವೃತ್ತಿ ತೆಗೆದುಕೊಂಡಿರುವುದು. ಆನ್‌ ಫೀಲ್ಡ್‌ನಲ್ಲಿ ನನ್ನ ದೈಹಿಕ ಸಾಮರ್ಥ್ಯ ಕಡಿಮೆಯಾಗುತ್ತಿದ್ದನ್ನು ಗಮನಿಸಿದ್ದೆ. ನನ್ನ ಸಾಮರ್ಥ್ಯ ಕುಗ್ಗಲು ಕೆಲ ಕಾರಣಗಳೂ ಇವೆ. ನಾನು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಆಡುತ್ತಿರಲಿಲ್ಲ. ಸ್ಪರ್ಧಾತ್ಮ ಕ್ರಿಕೆಟ್‌ ಕೂಡ ಹೆಚ್ಚು ಆಡಿರಲಿಲ್ಲ. ವರ್ಷದಲ್ಲಿ 2-3 ತಿಂಗಳುಕಾಲ ಮಾತ್ರವೇ ಕ್ರಿಕೆಟ್‌ ಆಡುತ್ತಿದ್ದೆ. ಹೀಗಾಗಿ ನನ್ನ ಶ್ರೇಷ್ಠ ಸಾಮರ್ಥ್ಯದಲ್ಲಿ ಆಡಲು ಸಾಧ್ಯವಾಗುತ್ತಿರಲಿಲ್ಲ. ಇದು ನನ್ನ ಪಾಲಿಗೆ ಸಹಿಸಲಾಗದ ಸಂಗತಿ. ನಾನು ಆಡಿದರೆ ವಿಶ್ವದ ಶ್ರೇಷ್ಠ ಆಟಗಾರರಿಗೆ ಸರಿಸಾಟಿಯಾಗಿ ನಿಲ್ಲುವ ಅವರಿಗೆ ಪೈಪೋಟಿ ನೀಡುವ ಸಾಮರ್ಥ್ಯ ನನ್ನಲ್ಲಿ ಇರಬೇಕು. ಆ ಸಾಮರ್ಥ್ಯ ನನ್ನಲ್ಲಿ ಇಲ್ಲ ಎಂದಾಗ ಆಟದಿಂದ ದೂರ ಸರಿಯುವುದೇ ಸೂಕ್ತ ನಿರ್ಧಾರ ಆಗಿರುತ್ತದೆ," ಎಂದು ಎಬಿಡಿ ವಿವರಿಸಿದ್ದಾರೆ.
ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯಲ್ಲಿ ಎಬಿ ಡಿವಿಲಿಯರ್ಸ್‌ ಹಲವು ಮನಮೋಹಕ ಇನಿಂಗ್ಸ್‌ಗಳನ್ನು ಆಡಿದ್ದಾರೆ. ನಾಲ್ಕು ಶತಕಗಳನ್ನು ಕೂಡ ಸಿಡಿಸಿರುವ ಎಬಿಡಿ ತಮ್ಮದೇ ಛಾಪು ಮೂಡಿಸಿದ್ದಾರೆ. ಆರ್‌ಸಿಬಿ ತಂಡದ ದಿಗ್ಗಜರಾಗಿ ಗುರುತಿಸಿಕೊಂಡ ಎಬಿಡಿ ಅವರ 17ನೇ ಸಂಖ್ಯೆ ಜರ್ಸಿ ಬೇರೆ ಯಾರೂ ಬಳಸಬಾರದು ಎಂದು ಆರ್‌ಸಿಬಿ ಫ್ರಾಂಚೈಸಿ 2023ರ ಐಪಿಎಲ್‌ ವೇಳೆ ನಂ.17ಗೆ ನಿವೃತ್ತಿ ಘೋಷಿಸಿತ್ತು.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ